चारोळ्या

क्षण वेचावेत असे की

मन हरवून जावे

हरवलेल्या मनातून

क्षण साठवीत यावे

--**--

मी कमी बोलतो म्हणून

शब्द कागदावर उतरतात

बोलायला गेलो तर

वेडे ओठातूनच परततात

--**--

मनामध्ये असू द्यावा

एक आठवणींचा कप्पा

म्हणजे हव्या तेव्हा मारता येतात

दूर गेलेल्यांशी गप्पा

--**--

तू अस पाहिलास की

वाटलं पाऊस पडायला हवा

मी अंग चोरताना

तुझा धिटाइचा स्पर्श घडायला हवा

--**--

तू माझ्या जवळ येतेस

पण मनापर्यंत पोचत नाहीस

तिथे मुक्याने प्राजक्त बरसात राहतो

तो तू कधी वेचत नाहीस

--**--

खपली देखील एकेकाळी

जाख्मेचाच भाग होती

फरक एवढाच की तेव्हा

तिथे वेदनेला जाग होती

----**--------

दुरून गावे फारच

सुंदर आणि सुबक दिसतात

गल्ली बोळातून फिरताना कळते

की ती किती विस्कटलेली असतात

-----********-------------

आपण त्याला महत्व द्यावे

ज्याला आपण आवडतो

नाहीतर आपण आपल्या आवडीसाठी

संपूर्ण आयुष्य दवडतो

-----********-------------

माणूस म्हणून जगताना

हा एक हिशेब करून तर बघा

किती जगलो या एवजी कसे जगलो

हा एक प्रश्न मनाला विचारून तर बघा