जगण्या मध्ये ब्रह्मानंद

जगण्या मध्ये ब्रह्मानंद

बरगड्यांच्या तुरुंगातून मी हृदयाला मुक्त केले 

जिथे जिथे धमनी आहे तिथे माझे रक्त गेले 

दिक्कालाच्या जबड्या मधील 

लवलवणारी जीभ मी 

आसक्ती च्या गर्भामधील 

धगधगणारे बीज मी 

माझ्या हातात महा यंत्र 

माझ्या मुखात महा मंत्र 

सगळे मिळून सगळ्या साठी 

मरण्यातही मौज आहे 

सगळे मिळून सगळ्या साठी 

जगण्या मध्ये ब्रह्मानंद 

विं दा करंदीकर

Read More

आयुष्याला द्यावे उत्तर

आयुष्याला द्यावे उत्तर

असे जगावे दुनियेमध्ये,आव्हानाचे लावुन अत्तर,
नजर रोखुनी नजरेमध्ये, आयुष्याला द्यावे उत्तर…

नको गुलामी नक्षत्रांची, भीती आंधळी ताऱ्यांची,
आयुष्याला भिडतानाही, चैन करावी स्वप्नांची…

असे दांडगी इच्छा ज्याची, मार्ग तयाला मिळती सत्तर,
नजर रोखुनी नजरेमध्ये, आयुष्याला द्यावे उत्तर…

पाय असावे जमिनीवरती, कवेत अंबर घेताना,
हसू असावे ओठांवरती, काळीज काढुन देताना…

संकटासही ठणकावुन सांगावे, आता ये बेहत्तर,
नजर रोखुनी नजरेमध्ये, आयुष्याला द्यावे उत्तर…

करुन जावे असेही काही, दुनियेतुनी या जाताना,
गहिवर यावा जगास सार्‍या, निरोप शेवटचा देताना…

स्वर कठोर त्या काळाचाही, क्षणभर व्हावा कातर-कातर,
नजर रोखुनी नजरेमध्ये, आयुष्याला द्यावे उत्तर…

कवी : विं दा करंदीकर

Read More