गीत १

असे दूर जाणे ,

तुझे सोसवेना 

मला एकट्याला ,

जिणे कंठवेना ...

जिथे जाय दृष्टी 

तिथे तू दिसावे 

तुझ्यापास मी अन् 

मला मी दिसेना ......

जरी दृष्टीने मी

 पितो पावसाळा 

तरी आत सारा

 उन्हाळा उन्हाळा 

थिजे सर्व संवेदनांचा हिवाळा

ऋतूंचे असे वागणे साहवेना !!१!!

असे एवढे दूर जाताही येते ?

असे एवढे शुष्क होताही येते ?

असे पार सारे 

विसरताही येते ?

तुला जे जमे ते

 मला का जमेना ? !!२!!

कवी - संदीप खरे

संगीत - सलील कुलकर्णी 

गायक - शुभंकर कुलकर्णी