शहाणपण देगा देवा

          शहाणपण देगा देवा

सुप्रसिद्ध अभिनेता, निर्माता, दिग्दर्शक महेश मांजरेकर यांचे चित्रपट म्हणजे भन्नाट मनोरंजन. ‘मी शिवाजीराजे भोसले बोलतोय’, ‘शिक्षणाच्या आयचा घो’ आणि ‘लालबाग-परळ’ या गाजलेल्या चित्रपटांनंतर महेश मांजरेकर ‘शहाणपण देगा देवा’ हा वेगळ्या धाटणीचा चित्रपट घेऊन येताहेत. ‘अश्‍वमी फिल्म्स’ आणि ‘मीराह एन्टरटेन्मेंट प्रा. लि.’ यांच्या संयुक्त विद्यमाने आकारास आलेल्या ‘ग्रेट मराठा एन्टरटेन्मेंट कंपनी’ची निर्मिती असलेला ‘शहाणपण देगा देवा’ हा पहिलाच चित्रपट आहे. आपल्या चित्रपटांतून मराठी अस्मिता जपणारे महेश मांजरेकर नेहमीच वेगळा विषय हाताळतात. त्यामुळे त्यांच्या या चित्रपटाविषयी प्रेक्षकांमध्ये आधीच उत्सुकता दाटली आहे.

या चित्रपटात भरत जाधव, अंकुश चौधरी, संजय नार्वेकर, वैभव मांगले, सिद्धार्थ जाधव, किशोर कदम, संतोष जुवेकर, कमलाकर सातपुते, मनवा नाईक, क्रांती रेडकर आणि खुद्द महेश मांजरेकर यांच्या अभिनयाची भन्नाट जुगलबंदी पाहायला मिळणार आहे. ‘दे धक्का’, ‘मातीच्या चुली’ या चित्रपटांचे दिग्दर्शन करणारे अतुल काळे व सुदेश मांजरेकर यांनी मिळून ‘शहाणपण देगा देवा’चे दिग्दर्शन केले आहे.
नावापासूनच वेगळेपण जपणार्‍या या चित्रपटात पाच वेड्यांची आणि त्यांना सुधारू पाहणार्‍या एका डॉक्टरची खळखळून हसायला लावणारी कथा यात रेखाटण्यात आली आहे. महेश मांजरेकर व अभिजीत देशपांडे यांनी लिहिलेल्या या चित्रपटाच्या पटकथेला खुसखुशीत संवादाची साथ संजय पवार व महेश मांजरेकर यांनी दिली आहे. प्रेक्षकांचे फुलटू मनोरंजन करणारा हा चित्रपट या वर्षअखेरीस दाखल होतोय.