Friday, September 12, 2014

जमला जन समुदाय अपार

वैराग्याचा मेळा(गमन)

जमला जन समुदाय अपार, मूक, उदास, गंभीरं
कोणी उधळती अबीर बुक्का, कोणां मुखी रामं

राग, लोभ, नाती, गोती, काम, क्रोध न उरला काही
सर्व संग परित्याग करुनी, निजला जणूकि संन्यासी

आयुष्य भर जो दिसला, तो देह समोरी निजला
सोडून गेला जो देहाला, तोच कधी ना दिसला

अज्ञाताच्या या प्रवासाला, आत्मा नंगाच गेला
तिरडीवती केवळ पसरला, देह रुपी हा अंगरखा

जमविला गोतावळा जरी, सारे प्रवासी घडीभरचे
अज्ञाताच्या या वाटेवर, अखेर एकटेच निघायचे

असतील अनेक जरी, सखे, सोयरे मित्र, सोबती
संपणार रे साथ तयांची, स्मशान प्रवेश द्वारी

सारे प्रवासी घडीभरचे, पाव्हणेच रे या जगी
काढले तिकीट परतीचे, जन्मा आलो ज्या क्षणी

ना रद्द व्हायचे तिकीट, ना गाडी कधी चुकायची
परतीच्या प्रवासाची ती, वेळ कधी न टळायची

उगवतील चंद्र तारे, चालेलच जग रहाटी
राहतील अंधुक आठवणी, भिंतीवर फोटो जोवरी

मृत्यूचीच असे ओढ जीवा, तोच शाश्वत मित्र त्याचा
भेटता देती आलिंगन दोघे, जीव तत्काळ सोडी काया

चिंतेनी किती जाळला देह, न जळला आयुष्य भरी
होता मुक्त चिंतेतून, तो देह जळला चितेवरी

राखले शरीर जन्मभरी हे, राख करण्याच स्मशानी
राख पसरता मनावरी ती, राखण्याची जिरली उर्मी

धडाडून पेटली चिता, वैराग्य धूर उडाला
कोण म्हणे ही अंत्ययात्रा, जमला वैराग्याचा मेळा

केदार....
(माझ्या "गमन" ह्या संग्रहातून)
https://www.facebook.com/kedar.mehendale.3

Wednesday, September 10, 2014

माझ्या जात्याला जात्याला


माझ्या जात्याला जात्याला हळूच बाई फ़िरवा
ओल्या हळदीचे हळदीचे शिक्के घरात गिरवा....

दारी करावल्या करावल्या बसल्या जेवायाला
थोड्या शेवाया शेवाया लावा गं ताटाला
नवीन नवरीला नवरीला बेसन पोळी वाढा
माझ्या लेकीची लेकीची नजर कोणी काढा
एका हातानं हातानं साखर पोळी भरवा ...माझ्या जात्याला

मोठ्या थाटानं थाटानं वाढवले लेकीला
माथा अंबेच्या अंबेच्या मंदिरी टेकीला
आली हौशीनं हौशीनं मोठी विहिणबाई
कुंकू चमकीचा चमकीचा मळवट लावा बाई
भरल्या ओटीत ओटीत देते शालू हिरवा....माझ्या जात्याला

गजरा लाविला लाविला केसावरती बाई
साडी नेसून नेसून सजली ही गौराई
गोर्‍या गालाला गालाला हळद लावा वहिनी
आल्या हळदीला हळदीला घरुन माझ्या बहिणी
मांडव आंब्याचा आंब्याचा गल्लुगल्ली मिरवा...माझ्या जात्याला

-- संतोष वाटपाडे (नाशिक)
FB Page : काव्यसंतोष
Blog : http://santoshwatpade.blogspot.in/
You Tube Channel :https://www.youtube.com/user/khaini009

Monday, September 8, 2014

जिजाऊच्या पोटी | शिवबा जन्माला


#मराठी

"शिवबा "

जिजाऊच्या पोटी | शिवबा जन्माला
सारा आंनदला | गोतावळा...

जिजाऊने दिले | लढाईचे धडे
धावे पुढे पुढे | तलवार...

आई भावानीने| आशीर्वाद दिला
बळ लढण्याला | येत गेले...

म-हाठी मातीचा | लावोनिया टिळा
एकेक मावळा | उभा केला...

देख रे माणसा | शिवबाची रीत
पाहे पर स्रीत |माऊलीला ...

नेहमी जपला | कल्याणाचा ध्यास
शेवटचा श्वास| जिंकण्याचा...

ध्वज खांध्यावर | घेऊन लढला
भगवा गाडला | मुलुखात...

माथ्यावर सारे | उन्हाळ झेलले
म्हणुनच किल्ले | हे दिसले...

धन्य धन्य झाली |जिजाऊ माउली
देऊन सावली | महाराष्ट्राला...
- रमेश माने
https://www.facebook.com/ramesh.mane.7739814

Sunday, September 7, 2014

उधाणलेल्या फ़ेसाळ लाटा



उधाणलेल्या फ़ेसाळ लाटा
उसळत राहतात आतल्या आत..
अनादि अनंताची जीवघेणी ओढ त्यांच्या ठायी
पार करायचाय शरीराचा अडसर
ओलांडून जायचंय डोळ्यांतलं आकाश...

पण
आवेगाला येतो उमजून
अडसराचा भक्कमपणा..
अथांग मर्यादा..
मग फुटत राहतो आतल्या आत
वास्तवाच्या रुक्ष खडकांवर...
उडत राहतात शुभ्र ठिकर्‍या
चौफेर!!

अंगभर फ़ुलारून उरतो
असाध्याचा कोवळा शहारा..

सगळं असोशीने थोपवून ओहोटीची वाट पहात राहणं किती अवघड असतं, माहितीये?

- बागेश्री
Bageshree Deshmukh
https://www.facebook.com/bageshree.deshmukh

Saturday, September 6, 2014

विचार



पाश्चिमात्य देशातील भांडवलशाही ग्लोबालायझाशनच्या नावर सगळीकडे पसरली आहे. पाश्चात्य देशात तुम्ही म्हणतात तसेच होते बडे उद्योजकच ठरवतात कोण नेतृत्व करणार ते. पहिले पाऊल म्हणजे लोकांमध्ये जागरुकता आणणे आज अमेरिकेत दुधामधे जे हार्मोन्स टाकले जायचे ते लोकाच्या जागरूकतेने टाकणे बंद झाले. भारत मुख्य करून शस्त्रे व विमानांची खरेदी पाश्चात्य देशाकडून करतो त्यामुळे शास्त्रास्तानसाठी भारतावर सहज
दबाव आणल्या जातो त्याबरोबरच भाष्टचारी नेते व त्यांची स्वार्थी नितीमत्तेला आपयाला बळी पडावे लागते युरोप माधे GMO फूड चालत नाही अमेरिकेत पण त्याला मागील काही वर्षापासून विरोध सुरु आहे त्यांना लेबलवर GMO आहे हे लिहा ह्यासाठी कायदा अणायाच प्रयत्न सुरु आहे हेच कारण आहे मन्सेनटो सारख्या कंपनी भारतासारख्या देशांमध्ये येण्याचा प्रयत्न करतात आहे. आपण आपल्या येथे जास्तीत जास्त उत्पादन सुरु करणे हा त्यावर इलाज आहे त्यासाठी रशिया व इजारायीलची मदत घेऊ शकतो. भारतात हुशार लोकांची कमी नाही पण नीट आखणी करून ह्या गोष्टी कराव्या लागणार आहे.
धन्यवाद
****शब्द शृंगार
https://www.facebook.com/profile.php?id=100008046221528

नभाखालती अथांग


#मराठी

नभाखालती अथांग
वेड्या वळणाच्या वाटा
दर्याखोर्या पहाडांशी 
काळ्या अंधाराच्या लाटा

वाट चालायची दूर
कुठे दिसेना सावली
मला टाकून एकटी
कुठे हरवून गेली

होता सकाळ पाठीशी
मध्यान्हीला पावलात
आता दिवस ढळता
कुठे विरली नभात

शोधशोधले किती मी
चोहिकडे आसपास
उगा चाहुलीचे तिच्या
खोटे खोटेच आभास

खोल मनाच्या तळात
हाक अवचित आली
आणि माझीच सावली
मला तिंथे गवसली

वर्षा
https://www.facebook.com/varsha.kulkarni.1840

Friday, September 5, 2014

धरेने ओढुनी घ्यावी धुक्याची रेशमी चादर


#मराठी

धरेने ओढुनी घ्यावी धुक्याची रेशमी चादर
तसे माझे तुझे नाते तसा माझा तुझा वावर...!

कुणाच्या सावलीला मी कधी बोलावले नाही
उन्हाचा पाहिजे तेथे करूनी घेतला वापर...!

तसा पाऊसही येतो ... तसे तर ऊनही येते
तरी काहीतरी होते...नभाला ओल आल्यावर...!

इथे माणूस जोडाया असा मी तोडगा केला
जगाची भोगुनी दु:खे...सुखाने जाहलो सादर...!

लफंग्याची कलाकारी...दुतोंड्याची अदाकारी
मलाही भेटला होता अशा गोषातला झोलर...!

निघाली रात्र माहेरी ... असे ना ऐकले केंव्हा
दिसाला गाठताना मी कधी ना पाहिले सासर...!

नवा आदेशही आला...नवी आश्वासने आली
जुन्या देशात अवतरला नव्याने एक सौदागर...!

खरे सांगा ... प्रतिष्ठेने कुणी का राहतो येथे
मनापासून कोणी का कुणाचा राखतो आदर...?

कधीचे संपले आहे ... जगायासारखे काही
मला तू सांगशी मृत्यू तुला आता म्हणे घाबर...?
-----प्रशांत
https://www.facebook.com/prashant.vaidya.503 

Thursday, September 4, 2014

गुणगुणावे तुला…की लिहावे तुला


#मराठी

गुणगुणावे तुला…की लिहावे तुला
भेट घ्यावी तुझी…की छळावे तुला…?

दूर आहे तरी…मी तुझ्या अंतरी
अन तरी सारखे मी सुचावे तुला…?

बोलता बोलता रात्र अंधाराते…
स्वप्न होऊन मी दूर न्यावे तुला…!

पानजाळीतुनी चंद्र डोकावतो
चांदणे सांगते बारकावे तुला…!

गंधली ही फुले पारिजाता तुझी
मी दवाच्यापरी जागवावे तुला…!

सांग केलास का तू असा कायदा
दोन श्वासांमधे आठवावे तुला…!
- - - - -प्रशांत
Prashant Vaidya
@ https://www.facebook.com/prashant.vaidya.503

हृदयाचे बंद द्वार


#मराठी

भेट
हृदयाचे बंद द्वार
अचानक सताड उघडले

पूर नाही महापूर नाही
महाप्रलय होता तो

कितीक वर्षांपासून सांभाळलेले
नाती गोती ,मान स्वाभिमान

सगळे सगळे वाहून गेले
राहिला बस

एक मोठ्ठा खडक 'विवेकानंद रॉक'सारखा हुबेहूब

ज्यावर कितीक काळापासून तुझ्या प्रतीक्षेत उभी 'मी'
अगदी आदिमाया पार्वतीसारखी

आणि

क्षितिजावर पाय रोउन उभा तू
जणू महादेवाचा ईश्वरी अंश शिव

आणि मग

अचानक गडगडायला लागले मळभ दाटून आले

आणि

आपल्यामध्ये वाढत चाललेल्या त्या प्रलयंकारी लाटा.....वाढत

वाढतच गेल्या !

..........स्वाती मेहेंदळे
https://www.facebook.com/swati.mehendale

Wednesday, September 3, 2014

कुणी कुणाचे ना उरले ।

#मराठी


कुणी कुणाचे ना उरले । स्वार्थात सारे गुंतले ।
आधार सरता सगळे । गुरूकडे मन धावले ।।

आम्ही आमच्या आरत्या । ओवाळी बघा रोजला ।
दया चापटी थोबाडात । डोळे उघडा आजला ।।

काम " हेच असे काम । मनास न दुजे काम ।
यास करा निष्काम " । मनात यावा हो राम ।।

स्वामी समर्था इकडे । द्या लक्ष सगळीकडे ।
गुंता सोडवावा तुम्ही । घ्यावे आता पलीकडे ।।

---------------------------------------------------------------------------------------------------------
कविता - हे स्वामी समर्था …!
-अरुण वि.देशपांडे -पुणे .
https://www.facebook.com/profile.php?id=100001994310283

Tuesday, September 2, 2014

तितकं वेडेपण झेपलं असतं तर….


#मराठी

तितकं वेडेपण झेपलं असतं तर….

पायाखालची वाट माझ्याच बापाची होती
शून्याच्या वळणावर सूचना लाखाची होती
हळव्या हळव्या कपाळावर आठी होती खडूस
मीच म्हणालो जीवनाला प्रेमात नको पडूस

पण तितकं वेडेपण झेपलं असतं तर….
वादळाच्या हृदयामध्ये बांधलं असतं घर …

भावनांच्या गालांनी खाल्ली होती थप्पड
कारण नशा चढण्याआधी केली होती धडपड
एक वणवा विझला तेव्हा एक प्रश्न मिटलाही
राखे मध्ये असतं "भलं" हा विश्वास पटलाही

पण तितकं वेडेपण झेपलं असतं तर….
मरणालाही म्हणालो असतो …. हात माझा घट्ट धर

झेपलं असतं तर….

- विजय बेंद्रे (एक वादळी पाऊस)
https://www.facebook.com/vijay.bendre.52

Monday, September 1, 2014

देव असलाच तर असावा


#मराठी

देव

देव----,
असलाच तर असावा
उगवत्या सूर्याच्या सोनवर्खी बिंबात
पडणा-या पावसाच्या पारदर्शी थेंबात
मेढीला फुटलेल्या हिरव्यालूस कोंबात

देव----,
दिसलाच तर दिसावा
आडवाटेला ऐचानात फुललेल्या एकांड्या फुलात
आपल्याच अंगठ्यातून दूध चोखणा-या मुलात
आजीच्या गोधडीत सुरकौतल्या उबदार गालात

देव----,
भेटला तर भेटावा
वेठबिगार मजूराच्या निढळाच्या घामात
हंबरणा-या गायीच्या करूणाकर प्रेमात
अन्यायाविरूद्ध पेटणा-या रक्ता-रोमरोमात

साहेबराव ठाणगे
https://www.facebook.com/profile.php?id=100008367404839

Saturday, August 30, 2014

नभाखालती अथांग


#मराठी

नभाखालती अथांग
वेड्या वळणाच्या वाटा
दर्याखोर्या पहाडांशी
काळ्या अंधाराच्या लाटा

वाट चालायची दूर
कुठे दिसेना सावली
मला टाकून एकटी
कुठे हरवून गेली

होता सकाळ पाठीशी
मध्यान्हीला पावलात
आता दिवस ढळता
कुठे विरली नभात

शोधशोधले किती मी
चोहिकडे आसपास
उगा चाहुलीचे तिच्या
खोटे खोटेच आभास

खोल मनाच्या तळात
हाक अवचित आली
आणि माझीच सावली
मला तिंथे गवसली

~ वर्षा
https://www.facebook.com/varsha.kulkarni.1840

Friday, August 29, 2014

कितीसा असा उरणार आहे


#मराठी

कितीसा असा उरणार आहे
दाटूनच आलाय तो बरसणार आहे..
कर्कश त्याचा वावर आहे..
सोसलं जे वसूल करणार आहे..
पावसाला पाऊस म्हणाव की नाही..
ही शंका आज असुरी काही
भावना त्याच्या मनात आहे..
भोगून बसला तो केव्हाचा
आता भिजवून भोग देत आहे..
मळभ दाटलेल मनातल कधीच
जणू आजच रित करणार आहे..
कदाचित मन दुखावल त्याच कुणी
तो आजच फक्त रडणार आहे..
ओसरताना वाढत हा दुखाचा नियम आहे..
तो ह्याच तत्वावर अडला आहे..
आज तो फक्त बरसतो आहे..
आत्मशांतिसाठी..
कदाचित त्याच दुःख उदया निवळणार आहे..

©मी शब्दसखा
https://www.facebook.com/Me.Shabdasakha

Thursday, August 28, 2014

तो यथेच्छ बरसत होता


#मराठी

तो यथेच्छ बरसत होता
मी एका आडोशाला होतो
छत्रीची उघडझाप करत
स्वत:लाच सावरत होतो

तो यथेच्छ बरसत होता
रस्त्यावर कोणीच नव्हतं
चहूकडे अंधार पसरलेला
काहीच दिसत नव्हतं

तो यथेच्छ बरसत होता
मी थोडं पुढे सरसवत होतो
चिखलातून चालत
माझा मार्ग शोधत होतो

तो यथेच्छ बरसत होता
मी त्याला धुडकारुन चालू लागलो
त्याचा वेग अजुनंच वाढला
मी त्याच्याशी लपंडाव खेळू लागलो

तो यथेच्छ बरसत होता
मला माझं घर दिसलं
आता घरी पोहोचणार तोच्
विजेंच्या कडकडाटाने मला घेरलं

तो यथेच्छ बरसत होता
एव्हाना मी घरी आलो होतो
त्याच्या परतीची वाट पाहून
मीच घरी परतलो होतो

तो यथेच्छ बरसत होता
त्याला अडवणारं कोणी नव्हतं
तो स्वत:च्याच अंगणात बागडत होता
त्याला जाब विचारणारं कोणी नव्हतं

तो यथेच्छ बरसत होता !!!!!

©:::: ::: :: प्रथमेश सुरेश शिरसाट
https://www.facebook.com/prathmesh.shirsat21071988

Wednesday, August 27, 2014

आता मी


#मराठी

आता मी
======
आता मी -
मन कठोर करायचं ठरवलंय...
आता मी -
तुला विसरायचं ठरवलंय …

मी बोलायचं,तू टाळायचं
हे नेहमीचं-
आता मी -
गप्प गप्प रहायचं ठरवलंय …

तुझा तोरा,तुझा गर्व
याची नको चिंता
आता मी -
स्वत: गर्वात राहायचं ठरवलंय

बदलणे हा तुझा स्थायीभाव आहे ,
असू दे!
आता मी -
स्वत:लाच बदलायचं ठरवलंय…

आता मी
मन कठोर करायचं ठरवलंय...
°°°°°°°°°°°°°°°°°°°°°°
©प्रकाश पाटील,वसई.
https://www.facebook.com/PrakashVasai

Tuesday, August 26, 2014

तृप्ती शोधतो आहे


#मराठी

तृप्ती शोधतो आहे

पंचतारांकित चवीला भोगतो आहे
भाकरी पिठल्यात तृप्ती शोधतो आहे

अंतरी भक्ती नसोनी, रोज जगदंबे,
पोट भरण्या जोगवा मी मागतो आहे

का मनाची व्यर्थ केली स्वच्छता इतकी?
आज जो तो चेहर्‍याला पाहतो आहे

मंदिरी जो कैद आहे देव, त्याला मी
का अजूनी सर्वसाक्षी मानतो आहे?

साजरा फादर्स डे करतोस का पोरा?
दान पिंडाचे मृतात्मा मागतो आहे

वाट नाही पाहिली केंव्हा कुणी ज्याची
त्या भणंगालाच मृत्यू टाळतो आहे

रोजचे घटतेच आहे मुल्य पैशांचे
छापल्या नोटात गांधी हासतो आहे

मनसुबे ऐकून घरचे, स्त्री भ्रुणालाही
जन्म श्वानाचा हवासा वाटतो आहे

मुखवट्यांवर भाळला "निशिकांत" इतका की
चोरही साधूच त्याला भासतो आहे

निशिकांत देशपांडे.
https://www.facebook.com/nishikant.deshpande.7

धुंदीत कोणत्या चंद्रबिंब पाण्यात घसरले आहे



#मराठी

" निशा "

धुंदीत कोणत्या चंद्रबिंब पाण्यात घसरले आहे
चांदणे चमकणे रोजसारखे आज विसरले आहे
धडपडतो ओला चंद्र कसा तीरावर येण्यासाठी
वाहत्या नदीपात्रात कधीचे क्षीर पसरले आहे...

वार्‍यात सुवासित कैक फ़ुलांचा गंध साठला आहे
खडकातून कोसळताच पांढरा झरा गोठला आहे
आवाज गरजतो मंजुळ ज्यांचा अवघ्या रानामध्ये
फ़ांदीवर कोकिळ पक्षांनी संसार थाटला आहे...

वेंधळ्या वेडसर चंद्राला ढग शोधत आले खाली
त्या ढाळावरती पायवाट झालेली आहे ओली
सांभाळून तोल ढगांना काही येणे जमले नाही
वाटेत कलंडले येताना चांगलीच धांदल झाली...

साकळले अल्लड थेंब दवांचे हलत्या पानांवरती
चंदेरी चादर अंथरली अविचल पाषाणांवरती
धावली हवेची झुळूक वनातून हलके पाऊल टाकित
वाजती पैंजणे जशी तसा ध्वनी आला कानांवरती...

अदृश्य चंद्र पाहुनी घराशी परतून गेले तारे
जांभळे निळे आकाश रिकामे झाले आहे सारे
पाण्यात चंद्रमा तोवर खांद्यापर्यंत बुडला होता
झाडावर शोधून थकलेले झोपले मेघ बिचारे...

~ संतोष वाटपाडे (नाशिक)
https://www.facebook.com/swatpade

Fb Page : काव्यसंतोष
Blog : http://santoshwatpade.blogspot.in/

तुझा… किंचीतसा अबोला ही

#मराठी

तुझा…
किंचीतसा अबोला ही
मला…
सहन होत नाही,
हे माहीत असतानाही
तु अबोला धरलायंस…
मी…
फार विचार नाही करणार…
नाहीतर पुन्हा
मी तुला तोलत रहातो,
असं वाटेल तुला…
नक्की काय चुकलं,
कुणाचं चुकलं…
हे प्रश्न नकोच आहेत,
तु… तुला हवा तितका वेळ घे…
मी मानलंय
चुक माझीच असेल…
तसा मीच चुकतो नेहमी…
पण…
आता आणखी हा अबोला नको…
- सुरज उतेकर
https://www.facebook.com/suraj.utekar.12

मी कुठे ग म्हणतो थांब जरा

#मराठी

मी कुठे ग म्हणतो थांब जरा
काकुडतो विव्हाळतो गजरा !

कधी आड रानी भेटून गडे
चौकात उगी गडतात नजरा !

डोळ्यात तुझ्या गंभीर काही
जरी चेहरा तुझा असे हासरा !

चल सोड भय , चिंता करूदे जगा
यौवनाचा सोहळा करू साजरा !

~ डॉ. अविनाश बी .पाटील
https://www.facebook.com/Dr.Avinash.BHMS